កំពង់ចាម៖ មនុស្សចំនួន០៣នាក់បានស្លាប់ និង២នាក់របួស ក្នុងហេតុការណ៍អគ្គិភ័យឆេះផ្ទះចំនួន១ខ្នង ស្ថិតក្នុងភូមិអង្គរបាន ឃុំអង្គរបាន ស្រុកកងមាស ខេត្តកំពង់ចាម នៅព្រឹកម៉ោងជិត០៥ទាបភ្លឺថ្ងៃទី០៧ ខែកុម្ភៈ ឆ្នាំ២០២៣។

បើយោងតាមការផ្សាយព័ត៌មានរបស់មន្ទីរព័ត៌មានខេត្តកំពង់ចាម ផ្ទះដែលឆេះនោះមានម្ចាស់ផ្ទះឈ្មោះ យ៉ា អ៊ែល ភេទប្រុស អាយុ ៥៦ឆ្នាំ។ ក្នុងហេតុករណ៍អគ្គិភ័យនោះបានបណ្តាលឱ្យមនុស្សចំនួន០៣នាក់បានស្លាប់ និង២នាក់រងរបួសបញ្ជូនទៅសង្គ្រោះនៅមន្ទីរពេទ្យ។

តាមប្រភពដដែល អគ្គិភ័យបានត្របាក់ផ្ទះសង់អំពីឈើ ដំបូលប្រក់ក្បឿង រៀបបន្ទប់សង្ក័សីក្រោមទំហំ (៦មែត្រ ×៨ម៉ែត្រ) ឆេះអស់ទាំងស្រុង។ ចំពោះមូលហេតុនៃការឆេះ សមត្ថកិច្ចកំពុងតែស្រាវជ្រាវ។

អគ្គិភ័យនោះ ត្រូវបានរលត់ទាំងស្រុងនៅវេលាម៉ោង៦កន្លះព្រឹក ដោយប្រើប្រាស់រថយន្តពន្លត់អគ្គិភ័យចំនួន០៤គ្រឿង៕